पथरीको हरियाली सामुदायिक वनलाई राष्ट्रिय पुरस्कार

साउन ३ गते,पथरीशनिश्चरे । पथरीशनिश्चरे नगरपालिका–२, स्थित हरियाली सामुदायिक वन उपभोक्ता समूहले गणेशमान राष्ट्रिय पुरस्कार पाएका छन् । पुरस्कार पाएपछि वन उपभोक्ताहरु खुसियाली साटासाट गरेको छ ।

शुक्रबार सामुदायिक वनको कार्यालयमा भेला भएर पत्रकार सम्मेलनको आयोजना गरी सुखियाली साटासाट गरेको हो । वन मन्त्रालय अन्तरर्गत वन तथा भूसंरक्षण विभागले २०७६ को गणेशमान सिंह सामुदायिक वन राष्ट्रिय प्रथम पुरस्कार—२०७६ प्राप्त गरेको छ ।

असार ३१ गते एक लाख राशीसहितको पुरस्कार थापेका थिए । ‘यहाँहरुसँग खुसी साटासाट गर्ने उदेश्यले यो भेटघाटको आयोजना गरिएको हो ।’ कार्यक्रममा वनका अध्यक्ष काबुलबहादुर मगरले बताए । उनले भने ‘यो पुरस्कार पाउँनुमा उपभोक्ताहरुको मेहनत, वन कर्मचारीहरु र पत्रकारहरुको पनि उत्तिकै भूमिका रहेको छ ।’

वन विभागले गणेशमान सिंह सामुदायिक वन राष्ट्रिय प्रथम पुरस्कार प्रत्येक बर्ष देशभरबाट एउटा सामुदायिक वनलाई पुरस्कृत गर्दछ । देशभर रहेको २२ हजार समुदायिक वन मध्येबाट यो बर्ष पथरीको हरियाली सामुदायिक वन उत्कृष्ट भएको हो । पुरस्कार १ नम्बर प्रदेशमै पहिलो भएको डिभिजन वन कार्यालय मोरङको प्रमुख विशाल घिमिरेले बताए ।

वन व्यवस्थापान, गरिवी न्युनिकरण, सामाजिक विकासमा उत्कृष्ट हुनुको साथै सुशासन रहेको आधारमा वन विभागले पुरस्कृत गरेको सव डिभिजन वन कार्यालय पथरीका प्रमुख महोमद अलाउदिनले बताए । हरियालीले यस अघिपनि गणेशमान सिंह पुरस्कारकै सान्त्वना पाएका थिए । त्यसैगरी २०७५ मा मोरङ जिल्लामा प्रथम, २०७४ मा जिल्ला दोस्रो र २०६३ मा जिल्लाकै सान्त्वना पुरस्कार पाएका थिए ।

पत्रकार सम्मेलनमा सामुदायिक वन समूहका अध्यक्ष काबुलबहादुर मागरले वन क्षेत्रमा चरिचरण, डडेलो, चोरी तस्कारी, फोहोर मैला जथाभावि फाल्ने कार्यहरु पूर्ण रुपमा बन्द गरेको दाबी गरे । तारबार विना पनि पुःनरुत्पादित विरुवाहरु सतप्रतिशत संरक्षण गरेको, समूहले वार्षिक २८ हेक्टरमा झाडी सफाइ र २८ हेक्टरमा थिनिङ पुनिङ (बाक्लो विरुवा छाट्ने), अग्नी रेखा निर्माण गर्दै आएको छ । खालि खाल्सामा विभिन्न जातको विरुवा लगाइदै आएको छ । समूहले पुरानो १३० वटा कंक्रिट कपुरथान(चिहान) भत्काएको विज्ञप्तिमा उल्लेख छ ।

हरियाली सामुदायिक वनले गरिवी न्युनिकरण कार्यक्रम अन्तरर्गत प्रत्येक बर्ष ५ लाखका दरले थप हुदै जानेगरी घुम्ति कोष स्थापना गरेको, सिलाइकटाइ, कृषि तालिम, खाट वितरण, शौचालय निर्माण, बर्षमा दुई वटा घर अति विपन्न उपभोक्ता सदस्य घर निर्माण तथा हस्तान्तरण, दीर्घ रोगी उपभोक्ता सदस्यहरुलाई अवस्था हेरी रु. १० देखि ६० हजारसम्म नगद आर्थिक सहयोग गर्दै आएको बताइएको छ ।

सेवा क्षेत्र भित्रको सरकारी तथा गैर सरकारी संघ, संस्थाहरुबाट सहयोग नुपुगेको क्षेत्रमा पुल, कल्भर्ट, बाटो ग्राभेल, ग्रामीण विद्युत विस्तार, सिंचाइ, सामुदायिक विद्यालयहरुलाई आर्थिक सहयोग गर्दै आएको अध्यक्ष मगरले बताए । काठ समूहको सदस्यभन्दा बाहिर विक्री नगरेको । समूहमा पाँच सय जनाले रोजगारी पाइरहेको जानकारी दिए ।

Leave a Reply

Your email address will not be published. Required fields are marked *